بلاوي بلاوي يابنات *ادخلو وتعرفون*

السلام عليكمـ والرحمه ..~

مراحب بكل الداخلين علشان يقرون القصة مع العلم انها منقولة
الموضوع يخص البنات بالتحديد وشوي من الشباب وانا اباكم بس تقرون الموضوع وتستفيدون منه
واتمنى اتمنى اتمنى من البنات بالتحديد انهم يركزون عدددل ف هالموضوع ويشوفون كيف تلاعب الشباب على اصوله ويشوفون الابواب والمداخل اللي يستغلونها الشباب عشان يوصلون لكمـ
والله ان الشباب يعرفون كللل شي .. وبيتوضح هالشي ف مضمون القصة
يااا بنااات انتبهوا انتبهوا انكم توثقون في ايي حد .. منو ما كان .. ولو شو ما سوى ..ولا يغركم الكلامـ المعسّل والحلو .. والكلامـ اللي كله حنان ورقّه .. لااا تثقوا ابدا ابدا
هاذي رساله وصلتني عالايميل وهو عبارة عن اعتراااف شاب لشاب ( راشد لمحمد ) والله انه كلامه قووي .. واتمنى انكم تركزون عدل ف الكلام اللي كان بينهم .. والله ان فيه كلام يهد جبااال

كان محمد واقف عند مقهى ويوم دخل المقهى تعجب يوم شاف راشد يعطي رقمه حق وحدهـ جدام الكل ومب مسوي أي اعتبار لاي حد وقالها بصوت عالي الساعه تسعه ونص
فراح محمد عند راشد وقاله ممكن ايلس وياك ..~
راشد قاله : ياخي لو تبا تعطيني نصايح فالجواب .. لا .. واذا تبغي تسولف وتتعرف حياكـ
فضحك محمد من جواب راشد اللي يدل عالملل وقاله لا مافي نصايح بس مجرد كلام وعلوم واخبار ومنكم نستفيد
فقاله : اتفضل
محمد : هو بس سؤال بسيط ليش يعني ترقيم وشغل وحركــات وين الانترنت والبلوتوث يعني انت ما تمشي عالموضه ؟!
فقال : يا حبيبي ترا كلنا ثعالب .. وكل ثعلب له طريقه وله هدف
محمد : انا عندي هدف بس انا مب ثعلب وانا دووم اوصل لهدفي مباشرة
راشد: بس اكيد انك تسوي أي حركه او أي مناورة عشان توصل لهدفك
محمد : اوكي يا ثعلب ما تخاف ان هاي البنت المسكينه تكتشف انكـ ثعلب وساعتها تعطيك على راسك
راشد : ما يهم بلقى غيرها ترا الفاضيات وايدات وهي اصلن مستحيل تكشفني (( لاحظتوا الغرور فيه ))
محمد : وليش ياخي مستحيل تكشفك إذا دخلت وياها قصه حب بتقولكـ تعال واخطبني قولي شو بترد عليها ؟

فضحك راشد عليه بصوت عالي وقاله باين عليك غشيم.. طبعا لازم قصة حب هل تتوقع أقول ألو .. لو سمحتي ممكن اتسلى بشرفج شويه
كلامه كان يرفع الضغط لكن محمد مسك اعصابه وقاله انزين ما جاوبتني شو عذرك لو قالتلك تعال اخطبني ؟
ضحك مرة ثانيه وقال .. اول عذر يا طويل العمر وأشهرهم عذر أكمل ...
قاله تكمل شو ؟؟
قال : اكمل المدرسه .. اكمل الجامعه .. اكمل المعهد .. بعدني ما توظفت .. اكمل الشقه المهر المهم اكمل أي شي ناقص
محمد : افرض يا ذكي انها قالتلك تعال اخطبني وكمّل على مهلك كيف تصرفها .. قول
راشد : ما قلت انك غشيم .. اهلي .. اهلي
محمد : سلامة اهلك
راشد : لا .. اهلي مو موافقين لين ما اكمّل
محمد : والله عذر .. لكن افرض قالتلك اهلك ليش انت ياهل لو كنت ريال تعال اخطبني .. قولي لو كنت حريف كيف تصرفها هاي ؟؟
راشد : اولا .. مافي بنت تقول جي واذا قالت بسيطه بقوللها السكر
محمد : شو فيه السكر
راشد : اقول ان امي عندها السكر ما اقدر ازعلها أو ابوي عندهـ القلب والكلام الفاضي واايد .. ياعمي انت ما تشوف تمثيليات
محمد : لا والله ما اتابع لكن في اعذار ثانيه غير عذر اكمل ؟؟
راشد : يا عمي الاعذار وايدهـ وانا يالس اقولك اشهرها خذ مثلا .. اذا انت ولد مدلّع تقول لازم نتعرف على بعض اكثر مب معقول نتزوج على طول لازم نحب بعض

محمد : الله يخرب بيتك هذا معناته كلام بالتلفون ومقابلات و... و... و...
راشد : طبعا .. عيل انا ليش عاطنها الرقم
محمد : اوكي غير عذر نعرف بعض فيه غيرهـ ...
راشد : ياخي انا قاموس اعذار وحجج خذ عندك مثلا اقوللها عمي
محمد : ياخي تراك عورتلي راسي تعطيني كلمة كلمة شو تباني اسويلك جمل مفيده .. مرّة أكمل وبعدين سكر وشويه اهلي والحين عمي وبعد شوي الخدامه
ضحك راشد وقاله يعني انا خاطبين لي بنت عمي وبعدين تنهد وقال بصوت رومانسي حزين إنتي تعرفين عاداتنا في الزواج يا فاطمه .. عطيني فرصه وانا بتصرف
محمد : لا حول ولا قوة الا بالله وسأله ياخي ليش تتنقل من وحدهـ لوحدهـ .. ليش بنت وحدهـ ما تكفي ؟؟
راشد : ياخي خلاص ما يصير لها طعم واليديد دايما له طعم احلى عمرك شفت وحده تشتري فستان ولو غالي وما تلبس غيرهـ .. ياخي اذا المريول اللي هو الزي الرسمي للبنات تلاقي عندها مريول ثاني كيف عاد بنت يديدهـ وكلام يديد ومواعيد يديدهـ
محمد : وين الحب الاول والكلام الكبير اللي يقولون عنّه
فقال راشد بعد ما غير من جلسته .. شوف اول بنت لها سحر خاص واول مكالمه واول جواب .. لكن اعطيك مثال شفت الصياد اللي يصيد سمك تلقى اول سمكه صادها فرحان فيها وتلقاه حاطها جدامه طول الرحله لكن اول ما يوصل هو بنفسه يحطها ف النار وهو اول واحد ياكل منها والبنات مثل الشباب يدورون الحب ويا اول بنت او ولد ويقولون هذا هو الحب لين ما تبرد العلاقه ويدورون حب ثاني وثالث ......
محمد : يعني انت تعترف ان مافي حب بين الولد والبنت
راشد : ايوااا .. حتى في القرآن الله عز وجل يقول (( وجعلنا بينهم مودة ورحمه )) شايف مودة ورحمه مب حب ومقابلات
محمد : كلام منطقي ومعقول لكن ليش الشباب بدون استثناء يحبون يتكلمون عن البنات اللي يعرفونهم جدام بعض .. يعني يفضحون نفسهم ويفضحون وياهم البنات
راشد : هاي مب فضايح .. يعني لو انت اشتريت سيارة يديدهـ بتراويها لربعك واللي يبني عمارهـ يراوي ربعه واللي يفوز بمسابقه يعلق الميداليه فرحان فيها واللي ف عمرنا ماله غير البنات يعني ولد صياد للبنات لسانه حلوو ووسيم ويطيّح الطير نفس ما يقولون
محمد : لكن الواحد يفتخر بشي يملكه كيف تفتخر بانسانه ما تملكها
راشد : لا يا حبيبي أنا أملكها ونص .. يعني أمها وأبوها يقولولها لا تكلمين حد وتكلمني
ويقولولها لا تطلعين ويا حد وتطلع ويايه
وأقدر أكلمها أي وقت وأشوفها أي وقت
معناته اني أملكها ونص
ياخي إذا كان ربنا يقوللها لاتختلي بغريب وتقابلني يعني عصت ربها عشاني
كيف تقولي إني ما أملكها ؟
رفع ضغطي بالقوو لكن كلامه صح
محمد : اذا كنت تقدر تشوفها وتقابلها في أي وقت ليش تطلبون صور وبعضكم يسجّل عليهم وبعضكم يصور فيديو والعياذ بالله
فقال : يا حبيبي هذا ضمان وإثبات المحبة يعني لو كانت تحبك بتعطيك صورتها والمبتدئين هم اللي يسجلون بالتلفون المهم الاقناع
محمد : أي اقناع هذي اعراض وشرف وفضايح كيف تقنعها

ابتسم راشد بابتسامه الثعالب وقال باسلوب مسرحي رااائع لدرجه ان محمد كان بيصدقه .. هاي هي آخرتها ما توثقين فيني ولا في حبي .. هاي اخر مكالمه بيني وبينج صدقيني انا طلبت صورتج بس عشان احطها جدام عيوني واملي عيني منها وعمري ما اطالع لوحدهـ ثانيه ولا خلينا نتصور نحن الاثنين ويا بعض .. يا حبيبتي مو نحن بنتزوج وكلام واايد .... في ألف طريقه وطريقه المهم تعرف كيف تضرب على الجرح نفس ما يقولون
محمد : اوكـ .. افترض انها ما عطتك لا الصورة ولا هم يحزنون .. بتتركهـآ
راشد : طبعا لا .. انـآ صياد و الصياد صبور و ما يمل
محمد : هني المشكله الفضاايح اللي بتستوي في البنات ما يفكرون فيها
راشد: انت تعرف شو هي المشكله إن كل وحدهـ تقول أنا واثقه من نفسي وحريصه أو انتو مب فاهمين شي والله جاسم غيير أو اصابع ايديك مب نفس بعض أو أحمد ولد ناس ومستحيل يسوي شي أو خالد يحبني وايد اصلن انا لو غبت عنه يتخبّل .. وكل وحدهـ مستحيل تتخيل نفسها بطلة ضحيّة مستقبلا وشوف بنفسك الانترنت مليان فضايح وكلهاااا بدت بقصة حب
محمد : بعد الفضيحه .. شو ذنب البنت المسكينه اللي سلمتلك قلبها
راشد : هذا حال الدنيا ومحد ضربها على إيدها وقالها كلميني بالتلفون ولا كانت صبرت لين ما ياها نصيبها
محمد : بصراحه لو في بنت تورطت بمكالمات وصور كيف ممكن انها تطلع من دوامة التهديد
ضحك راشد وقال شكلك تبا تعرف سر المهنة لكن اقولك وخلها بيني وبينك عشان الشباب ما يزعلون .. شوف يا عمي ما يرد التهديد إلا التهديد يعني حتى الولد ما يبا فضايح .. يعني ممكن تقوله انا ببلغ ابوي عنك وبخليه يبلغ الشرطه واحصل ضرب من ابوي مرة وحدهـ ولا أنذل لك طول عمري أو حتى تبلغ مديرة المدرسه أو الوكيله وصدقني صارت وايد والوكيله تعرف كيف تكلم أبوهـ او تكلم مدير المدرسه او الجامعه أو حتى تكلم الشرطه أو هيئة الامر بالمعروف بينهم وبشكل رسمي بس سري .. ومن دون حتى اهلها ما يدرون علشان المشاكل والفضايح وأحسن لها ان المديرة تعرف ولا اهلها وجيرانها واصحاب الانترنت كلهم يعرفون أو حتى تبلغ هيئة المعروف والنهي عن المنكر بنفسها بالتلفون وصدقني الشرطه وهيئة الامر إسم يخوّف ويخلي الولد يرتجف من الخوف
محمد : انت ما تخاف اني انشر هالكلام ويطيح سوقكم
فضحك راشد وقال يا عمي والله لو تنشره وتخلي كل بنت تقراهـ في طابور الصباح ما بيتوبون .. كم وحدهـ بتّوب .. ميه .. ألف .. خليهم يتوبوا والباقي نصيبنا يا معشر الشباب
شاف محمد الساعه وكان جريب أذان العشا فشل اغراضه وودع راشد
فقاله راشد على وين ساير .. تو الناس
محمد : بروح قبل ما يأذن العشا
راشد : شي وقت باقي على الاذان عشر دقايق
محمد : يادوب أدورلي مسيد وألحق الصف الاول
فضحك راشد بصوت عالي وقال لمحمد .. انت طول الوقت يالس تشوف الساعه وتخطط تلحق الصف الاول عشان تصيد الاجر .. ما قلتلك يا حبيبي كلنا ثعالب وكل واحد يتفنن فـ صيد اللي يباهـ ثم انصرف محمد

وانا تساءلت اني لو نشرت هالكلامـ كم بنت ممكن انها تترك المكالمات وكم بنت تتبقى من نصيب الثعالب
"وبعدين تذكرت قوله تعالى " من يشأ الله يضلله ومن يشأ يجعله على صراط مستقيم
بنات يا حبايب قلبي
فكري بس لمجرد دقيقه
بأبوج اللي يمشي جدامج
ولا بأمج اللي تدعيلج وتحبج
ولا بأخوج اللي مهما غلط يبقى سندج ف الحياة
ولا بإختج البريئه اللي بتنظلم عشانج
كيييف تهينينهم عشان جرذ ما بقول ثعلب لانه ف النهاية خسييس ومكانه المجاري
يعني ترضين إنج تحسسينهم بالذل ويمشون طول عمرهم راسهم بالارض
فكري بنفسج وحالتج
مهما حسيتي إنج واثقه بشخص او إنج تحبينه
باب بيتكم يوسع جمل ليش مايدقه
فاذا قلتيله وطوّل السالفه اعرفي انه جذاب(( ومن ترك شيئاً لله عوضه الله خيراً منه ))
خلج ذكيه وتذكري ابوج وامج بلحظتها
وكيف بتكسرينهم وتهينينهم جدام العالم
لمجرد غلطه !!!
واذا كنتي عاقلة بتفكرين بربج قبل الكــــــل
اللهم رد شباب وبنات المسلمين إليك رداً جميلاً واهدهم إلى صراطك المستقيم يارب العالمين .. آمين
وفي النهاية اتمنى الاستفادة للجميع ..